धोनी ! धिक्कार है तुम्हे , शाहरुख खान ! धिक्कार है तुम्हे !
कुछ विज्ञापन त चिरडाँद इ छन
कुछ विज्ञापन त चिरडाँद इ छन
चबोड़्या : भीष्म कुकरेती
अचकाल हम विज्ञापन बगैर ना खै सकदा , ना पे सकदा ना ही से सकदा। अब हमारी संस्कृति विज्ञापन ही निर्मित करदन ना कि समाज, ना कि नेता लोग अर ना ही इमाम या शंकराचार्य । हमर उठणो -बैठणो तरीका अब विज्ञापन पर निर्भर करदन , हंसण -बुलणो सलीकाविज्ञापन पर निर्भर हूंदन अर अपण काका -काकी , बडा -बोडी या रिस्तेदारुं पर हमेशा शक करण हम टीवी सिरियलूं से सिखदा।
यद्यपि अशोक महान का लाट -पिल्लर बथान्दन कि विज्ञापन तब बि हूंदा छा जब गढ़वाल मा लोग खस भाषा मा बचळयांद छा , पंडित लोग संस्कृत पढ़ान्दा छया पर सरकारी विज्ञापन (लाट /पिल्लर ) पाली भाषा मा हूंद छा जो आम गढ़वळियुं समज मा नि आंद छा। आज बि आदि वास्युं क्षेत्र मा अंग्रेजी मा सरकारी समाज कल्याण का होर्डिंग लग्यां रौंदन अर फिर कॉंग्रेस सरीखा पार्टी रूणी रौंद कि हमर काम लोगुं समज मा नि आई।
सबसे पैल त प्रदेश सरकारुं पर्यटन बिज्ञापनुं मा मुख्यमंत्रिक फोटो देखिक चिड़ लगद। मि आज तक नि समज सौक कि ताजमहल पर्यटन विज्ञापन मा अखिलेश , मायावती या मुलायमक थुबड़ा किलै दिखये जांद। जौंक इच्छा ताजमहल दिखणो ह्वावो बि तो ताजमहल पर्यटन विज्ञापन मा अखिलेश , मायावती या मुलायमक थुबड़ा देखिक भौत सा उत्तर प्रदेश की यात्रा नि करणो सौगंध खै दींदन याने उत्तरप्रदेश की यात्रा इ स्थगित कर दींदन।
भौत सा विज्ञापनु मा आंद कि सौ साल पुरण ब्रैंड जन कि साबण अब नया पैक मा ! ये भै जब माल मसाला वी च तो नया पैक से हम तैं क्या फैदा ?
अजकाल इन विज्ञाञपनुं बड़ी धूम च जु बुल्दन और अब हमारा बिस्कुट नया मिनरल के साथ। याने ब्याळि तक तुम हम तैं बेवकूफ इ बणाना छया।
भौत सा टीवी चैनेल शारदा चिट फंड स्कैम का साथ साथ ममता बनर्जी तैं बि गाळी दीणा रौंदन अर दगड़ मा N Mart का विज्ञापन बि प्रसारित करणा रौंदन। N Martकुछ नी च MLM कम्पनी च अर एक दिन N Marन बि वी खेल खिलण जु शारदा चिट फंडन ख्याल !
फिर जब टीवी मा हनुमान मूर्ति का फैदा दिखैक मॉडल बुलद कि बस हनुमान जी की मूर्ति ड्यार लावो अर सुख , सफलता अर समृद्धि पावो। इनि जि यी मूर्ति कामगार हूंदा त वु मॉडल जु ये विज्ञापन मा मॉडलिंग करद एक सफल फ़िल्मी कलाकार नि ह्वे जांद। बिचारा मॉडल तैं पैल बि फिल्मों मा , टीवी सीरियलूँ मा काम नि मिल्द छौ अर वु मॉडल आज बि दिनभर निठ्ठला बैठ्युं रौंद।
चिरड़ त महेंद्र सिंह धोनी या शाहरुख खान पर बि आंद कि रुप्यों लोभ मा यी शराब का विज्ञापनुं मॉडल बणन मा बि नि शर्मांदन। ठीक च शराब निर्मातौं जनम तो मानव जीवन तैं नारकीय बणाणो वास्ता इ हुयूं च अर तास , सोडा या म्यूजिक कैसेट का नाम पर शराबौ विज्ञापन करदन किन्तु शाहरुख खान या महेंद्र सिंह धोनी तैं त थोड़ा सि शरम हूण चयेंद कि चार पांच करोड़ रुपयों बान भारतीयवास्युं तैं शराब की लत किलै लगाणा छंवां ? शाहरुख खान ! महेंद्र सिंह धोनी ! यदि अबि बि अपण कमाई से नि अघायो तो रस्ता मा भीख इ मांग ल्यावो तुम तैं एक दिन मा इथगा भीख मिल जालि कि तुमर सात पुस्तुं तक पैसौं कमी नि रालि। धोनी या शाहरुख तैं समजण चयेंद कि यदि तुमर हुनरो कारण लोग तुमर अनुसरण करदन तो यांक मतबल यु त नी च कि तुम शराब ब्रैंड का विज्ञापन मा मॉडल बौणो। धोनी ! धिक्कार च , शाहरुख खान ! धिक्कार च । चुल्लू भर पाणि मा डूब मरो। भौत सा लोग तुम सरीखा सलेब्रिटी तैं श्राप बि दींदन कि जावो ! यांसे बढ़िया तो तुम कोढ़ी ह्वे जाँदा तो ठीक छौ अर तब या बात भारत मा फैलि जांद चूँकि शाहरुख खान अलण शराब पींद छौ अर धोनी फलण शराब पींद छौ तो यी द्वी कोढ़ी ह्वे गेन।
इनि भौत सा विज्ञापन रोज हम तैं चिरड़ाणा इ रौंदन। 17/1/15, Bhishma Kukreti , Mumbai India
*लेख की घटनाएँ , स्थान व नाम काल्पनिक हैं । लेख में कथाएँ , चरित्र , स्थान केवल व्यंग्य रचने हेतु उपयोग किये गए हैं।
No comments:
Post a Comment